深藍建制派律師何君堯議員發動聯署，要求香港大學校委會開除港大法律學院教授戴耀廷，建制愛國報紙叫戴教授為戴妖（耀之諧音）或者戴丑，於是又有人稱呼何君堯為何君妖（堯之諧音），變成「何妖」鬥「戴妖」，搞到滿天神佛。建制派聲稱有七萬人聯署，指港大校委會不能漠視民意！
你估咁容易咩，過往不時有幾萬人聯署要求特區政府做呢樣，做嗰樣，特區政府從來置若罔聞，港大校委會憑乜嘢理由會聽從「何妖」之言？港大校委會主席李國章雖然亦是藍絲帶，由梁振英委任，畢竟在劍橋受教育，與「何妖」在英國受教育，係有啲唔同嘅；李國章自己做過中文大學校長，係學術界中人，知道大學要炒一個tenure（實任）教授，非常非常困難，除非該教授犯咗刑事案，入過監倉；此外，港大校委會即是其他大學嘅校董會，校董會只是大學最高決策機構，並非行政機構，炒實任教授要校長徵詢教務委員會（senate）嘅同意（或不反對）先至可以服眾，雖然同是藍絲，李國章唔會儍到策劃同「何妖」裏應外合，一唱二和咁去炒「戴妖」嘅，否則香港大學百年來金漆招牌可以由薄扶林丟落汲水門，廣大港大校友引以為恥，以後在國際抬不起頭來。
有合約在身之教授，就可以被校長以種種不同理由，中止合約，故此美國啲大學教師得到教職之後，最初十年八年都要拚命研究，發表學術論文，希望憑實績早日得到tenure，左丁山讀書時，香港冇人理會呢樣嘢，依家香港嘅大學教師升遷制度，已幾乎跟足美國，教授出唔到論文就會失去教職合約，之不過得到tenure之後，往往過咗海就係神仙！但美國大學之tenure原意，係以長期任職來留住有名望有研究紀錄嘅教授，保證佢哋不會被無理解僱，在學校可以享有充份學術自由，而學術自由乃一流精英大學之基礎，特別係對人文學科、社會學科與商科而言，中國內地大學無論點樣有錢，只會在科研方面追上世界水平，在其他需要獨立思考自由嘅學系，因有言論禁區，分析不能背離馬列毛主義，始終難以達至一流水平。香港十優尖子如到內地大學攻讀人文社會學科，直情係明珠暗投，可惜之至！大學乃言論自由、思想自由之地，政治鬥爭唔應該拖埋大學落水，「何妖」等同路人搞聯署批鬥「戴妖」，非常不智，有意圖搞垮香港大學之嫌，根本係破壞香港利益。