國足正式緣盡下年世界盃，講真納比已經幫到盡，中國球員乜料子，大家心中有數；坦白講，如果淨係講體力、講身材，中國喺亞洲都唔係太輸蝕，但喺國內比較封閉嘅環境下練習、比賽，難免影響球員嘅心理發展。喺國內嚴格控制思想嘅地方，連《爸爸去那兒》呢個兒童節目都被禁播，就知道國內最緊要係政治政確，思想統一。
相反，南美國家嘅思想就最為開放，球員個性亦都比較自我，冇錯喺球場上，佢哋有啲個人表演式盤扭，係吸引到唔少目光，但如果講求紀律性、團結性，南美球員就較為不足。轉會市場關閉，唔少球員走唔成，嗱，唔好話小弟偏見，阿仙奴翼鋒阿歷斯山齊士、利物浦中場菲臘比古天奴、車路士前鋒迪亞高哥斯達（生於巴西，入籍西班牙），都係南美兵，山神仲言之鑿鑿唔會再為阿仙奴披甲，等下年一月先再出走曼城。
坦白講，罷操、罷踢同白支人工冇乜分別，職業道德上真係唔係幾啱；但作為職業足球員，一般生涯都係十幾年，成名而賺到大錢，只不過幾年光景，球員肯以名聲作為賭注，犧牲真係好大，特別係下年係世界盃年，長期冇喺正式比賽出戰，難免影響入圍國家隊機會。
正所謂良禽擇木而棲，球員要搵更具野心，更啱自己嘅比賽，係無可厚非；好似山神嘅例子，佢想離開阿仙奴，都唔係因為貪曼城高薪，佢只不過想去一間更有野心球隊，可以贏更多冠軍。
一生一球會，好似托迪、傑斯，與球會共患難，好似迪比亞路、巴迪斯圖達，陪球會降班，當然值得尊敬，但球員爭取自己認得嘅尊嚴，絕對係「造反有理」。
文：牽牛