南美兩大球星美斯同埋阿歷斯山齊士，都無緣亮相明年俄羅斯世盃決賽周？周二世盃外圍賽南美區分組賽，阿根廷同智利齊齊撞板，阿根廷主場只能夠1:1逼和包尾嘅委內瑞拉；智利就作客0:1不敵玻利維亞。阿根廷同智利𠵱家都喺前四位置之外，剩番兩輪分組賽，形勢好險峻。
南美區世盃外由10支球隊競逐，每隊踢18場波之後，前四名直接躋身明年世盃決賽周，排第五仲有價講，將會同大洋洲代表，即係新西蘭踢兩回合附加賽爭世盃入場券。阿根廷喺上屆世盃屈居亞軍，之後再連續兩年美洲國家盃決賽輸畀智利，三年都喺大賽決賽拎亞軍；球隊喺世盃外成績浮浮沉沉，周二第16輪賽事，主場迎戰包尾嘅委內瑞拉，足智彩開出「讓球主客和」阿根廷[-2]，點知對住魚腩都係食唔到，50分鐘先失守被客軍梅里路先開紀錄；阿根廷全場有21次射門，但要靠對手烏龍波先可以扳平，最終1:1和局失分。
最後兩輪非勝不可
由山神領軍嘅智利一樣冇運行，作客下游球隊，已經冇機會出線嘅玻利維亞，59分鐘輸12碼，結果玻利維亞再次喺高原主場贏波，靠呢個極刑小勝1:0。今夏一直受轉會傳聞纏繞嘅山神，賽前被前智利主帥批評有大肚腩狀態唔掂，睇嚟真係要扚起心肝操番起狀態。
經過今輪賽事之後，阿根廷同智利分別排第五同第六，下月最後兩輪賽事絕對不容再失。阿根廷將會迎戰秘魯同作客厄瓜多爾；至於智利就先迎戰厄瓜多爾，煞科戰作客巴西。阿根廷主帥森柏奧利賽後話：「好彩嘅係我哋仲有兩場波，不過一定要全部贏晒。」智利主帥比斯就話：「我哋已冇退路，惟有喺下月兩場波全力爭勝。」
至於南美區榜首巴西，賽前已提早出線決賽周，作客哥倫比亞1:1和局收場冇傷肝。