家陣球員如果想轉會，球會又冇意思放你走，基本上有套方程式大家慣常會見到：先係遞交轉會申請，即係所謂攤牌，話畀對方聽勉強冇幸福，大家最好好來好去，你有轉會費收，我又可以達到我嘅目的，但如果球會都係無動於衷，仲堅持死都唔賣，惟有出下一步 ──罷操或罷踢。出得呢一招，就係擺明同球會擘面，一拍兩散，甚至被球迷鬧反骨都在所不惜。
小弟冇意思站在道德高地，批評罷操或罷踢缺乏職業球員道德，因為今個世代聽落好老土，但球員同球會之間根本係僱員同僱主嘅關係，雙方有簽約，罷操或罷踢其實都係違反合約精神，即係等同打工仔拒絕返工，老細唔單止唔使再出糧，炒魷都好合理。
不過，球星就係非一般打工仔，佢哋可以幫球會搵錢，而好多人就利用呢一點橫行霸道肆無忌憚，好似今夏跳槽去巴塞隆拿嘅奧士文尼迪比利咁，早前為轉會無故缺操，甚至連人影都搵唔到，但球會又無可奈何。
咁樣做係咪就可以成功令球會放你走？又唔一定，而且仲要冒好大風險。好似菲臘比古天奴同阿歷斯山齊士家陣情況，就因為球會點都企硬，今個轉會窗走唔到，之前搞到咁唔愉快，睇嚟只有快快同球會及球迷修補關係。
當然呢兩位仁兄喺國家隊一向地位超然，基本上又唔使怕冇乜出場機會，影響明年踢世盃嘅機會，但好似迪亞高哥斯達就慘啲，雖然佢個case唔同，但亦係同車路士因為反面，而搞到今次西班牙踢世界盃外圍賽，冇召佢入隊，真係得不償失。
文：盧卡東尼