陸續有騎練開齋，這晚（6日）第六場三班1200米輪到騎練蔡明紹同容天鵬，兩人憑排位後補出的冷馬「勇敢傳說」攜手捧走公益金盃，該匹澳洲自購馬初跑谷草，成功打開在港勝門，單Win及組合獨贏A3分別派323.5及31.5元。
「勇敢傳說」唔單止係蔡明紹新季度首匹頭馬，仲係佢近四個幾月內第一Win，須知佢對上一次贏馬已是4月26日「勁豐裕」。
呢位前馬壇新童4月30日出賽後，因腳部嚴重受傷，上季餘下時間冇再上陣，直至早前香港唞暑，於新加坡傷癒復出作短暫客串，結果無功而還，直到今晚終憑「勇敢傳說」重返久違的凱旋門。
「勇敢傳說」留前鬥後，沿途守第九位，直路尾一陣風般撲上，輕勝2.25馬位，此駒暫時在港3戰得1冠1殿1第六名，4歲馬前景一片光明。
「勇敢傳說」馬主林建康以往最叻養過出道頭6場全勝的「勇敢小子」，本身已一段時間冇贏過名下馬。林太林黃寧艷表示賽前認為只有位置機會，估不到可以取勝，非常驚喜。
林建康則表示此駒第一次跑快活谷即勝始料不及，蔡明紹很早已表示很喜歡此馬，後來紹仔受傷，所以之前兩仗才用其他騎師，其後蔡明紹康復，他對林建康表示好想騎番「勇敢傳說」，馬主於是成人之美。
容天鵬表示「勇敢傳說」臨場比較緊張，蔡明紹發揮出色，早段步速偏快，騎者沒有力搶，反而讓座騎輕鬆地競跑，贏在騎師發揮和賽事形勢。
第六場三T尾關二至四名分別為「問鼎高峰」、「理想回報」及「狀元才」，四重彩派29萬幾。三T正獎有人中，每注派409萬幾。