2017-18年度快活谷開鑼戰於這晚(6日)上演，結果綽號「火車潘」的潘明輝，成為今季首位贏馬的華人騎師，他夥拍蘇偉賢馬房「好富有」落飛至5.95倍着綠燈下，以前置跑法建功，組合獨贏A3則派31.5元。
剛戰開鑼日雷神莫雷拉贏頭5場，尾5場則由5位不同洋將勝出，華人騎師一籌莫展，好在到今晚見習生潘明輝爭一口氣，先拔頭籌，策「好富有」起步迅速，沿途在二疊跟放，雖然冇遮擋，但藉輕磅之故，直路馬兒猶有餘勁，力拒後上馬衝刺，險勝多負21磅的「騏名燈」短馬頭位，令之前9戰零獎金的「好富有」踏入新馬季即有突破，打開勝門。
蘇偉賢繼開鑼日贏「同德福」後又再食頭糊，他指出「好富有」健康正常，可惜搵不到特別的長處，不過由於牠已減了很多分，加上用潘明輝再減7磅，故賽前料到有機會，他給潘明輝的策騎指示是希望守在三至四位，如果未能如願，就臨場執生，今場人馬贏得驚險，差少少就被「騏名燈」追過。「好富有」將在周日(10日)再出角逐五班1400米，希望趁勇連捷。
今場二至四名順序為「騏名燈」、「路路發」及「辣得寶」，四重彩
派18,780元。