香港蘇富比今年嘅秋拍會喺9月29日至10月3日舉行，有關中國書畫嘅拍賣會則喺10月2日進行。
今次嘅中國書畫秋拍會有近300件近現代書畫作品，總估值達2.6億元。蘇富比噚日舉行傳媒預覽，其中最受關注嘅係李可染嘅山水畫代表作《千巖競秀萬壑爭流》，呢幅長逾1.7米、寬約1米嘅山水畫創作於1978年，尺幅之巨市場罕見。畫名嚟自魏晉南北朝嘅《世說新語》，形容浙江會稽山嘅秀美，據知李可染曾經喺50年代到訪會稽山，之後不時將之融入畫作。
蘇富比估價7,800萬元
呢幅山水畫估價係蘇富比中國書畫部歷來最高，估價約值7,800萬元，超越2016年喺蘇富比春拍估價5,000萬至6,500萬元、最終以2.4億元成交嘅張大千潑彩畫《桃源圖》。
其他焦點拍品仲有傅抱石嘅《西山夜渡圖》同張大千嘅《西園第一紅》等。