好耐冇出function嘅李偲嫣，呢幾日去咗勞資審裁處，但唔係撐警，而係變身苦主追數。佢話兩間網媒拖佢糧，幫公司墊支咗飯局錢又冇回水，入稟想追番15.8萬。之不過法庭一核對佢呈交嘅飯局單，就發覺銀碼報大咗500幾蚊，偲嫣BB承認填錯咗個「約數」落去。
偲嫣申索筆數有兩餐8,000同3,500蚊嘅晚宴，但單據白紙黑字嘅數就得7,800同3,100蚊，阿官要求佢解釋，佢話申索書填錯嘢。
噚日上證人台作供嘅偲嫣用基督教形式宣誓，話自己幫兩間被告公司做「總監」（英文牌頭係CEO），每月份糧有5.7萬。但佢自認由頭到尾冇簽過僱傭合約，話公司董事張俊勇直至佢離職都未畀到佢簽。阿官更發現偲嫣BB卡片寫嘅公司，竟然唔係被告，而係其他公司噃。