參選時「金句」不絕，而她不知蛋撻有牛油皮與酥皮之別，現屆立法會新丁新民黨容海恩，被傳媒稱呼「儍大姐」，邀約談一年議會生涯，她搶着為自己平反：「儍就唔識打機啦！」外間看成坦率的褒詞，在她眼中卻有貶義：「我唔覺得係好（稱呼）喎，點解成日寫呢樣？即係冇認真睇我嘅工作，嚟嚟去去就話人哋儍！」她說未來要轉型，多在前台論政治，冀外界不只留意其賣相舉止，還有議會工作表現。
「入咗立法會，都算習慣嘅，但真係比較困身，會（議）多兼時間長，我又參加咗好多小組委員會，係好吃力，有時一日連走幾場，成身臭汗味，呢年幾乎冇試過9點前返到屋企㗎。」
「以前成日一個人上場打仗（本身為大律師），𠵱家就多咗要同人接觸，要work as a team，好多時要互相遷就、聽多啲意見，又要兼顧他人感受，所以……個人學識要圓滑啲囉，哈哈！（聽聞你係友誼小姐？）我係同不同黨派議員有偈傾㗎。」
「（係咪最開心立會通過你提出的制衡領展議案？）我反而覺得呢件事好frustrated（挫敗）、絕對唔係政績喎，因為講完一大輪，政府回應時嚟個大turn off（沒任何承諾），冧山泥咁！（喺UGL專責委員會被謝偉俊批評冇法律常識係咪蝦你？）我又冇乜嘢喎，當時只係問自己：我有問題咩？咪當佢當時有啲情緒囉！」
為工作「荒廢」打機
「呢屆我冇喺政治議題comment咁多，嚟緊一、兩年會喺政治同民生議題攞個平衡。（點解呢年唔講？）因想穩住陣腳，再逐樣加上去，始終係新人，要兼顧好吃力。（唔怕講政治好惹火？）咪唔好踩人囉，你做打手，實俾人藐，我講意見啫！（民生政治議題）兩者都要兼備，把把刀都要利；如果唔磨呢把刀，永遠只係一堆廢鐵。」
「可能競選期間一啲事（註：曾在論壇被批答非所問）令到啲人對我有誤解……（啲人覺得你贏梗……）其實我唔係實贏㗎囉，係有好大危機會輸㗎囉，其實所有參選嘅人都付出好大努力，可能新丁係被打擊嘅對象，但我會遇強越強。講多次，我會遇強越強。」
「其實只要細心啲睇我呢一年嘅工作，就會發現我唔係咁（儍）嘅……儍就唔識打機啦，知唔知啲網民叫我乜名？叫我『恩恩豬』呀，又同我喺網上傾偈……最近我俾聯盟踢走，因為近期少打咗，仲令啲網友（有）罵戰，有人怪責做乜踢我走，哈哈！」
「（傳媒）偏重講我嘅輕鬆嘢多啲，可能做嘅議題真係太散，冇乜人注意，未來可能要做得集中啲，等人哋知道你真係有做嘢。（咁你𠵱家識分牛油皮同酥皮未？）其實我覺得都係一樣㗎囉，哈哈哈！」
■記者許偉賢