香港所有風球早已除下，但雨就照落，沙田馬場今朝(5日)既大雨又視野不清，好多練馬師到縮咗去烽火台避一避，甚至留在馬房辦公室，偏偏沈集成唔怕變落湯雞，冒住大雨在機坪督操，搏殺決心表露無遺。
沈集成咁神心，主要係為了睇第五場四班1200米的「大英雄」及第八場二班1200米的「幸運年年」，沈集成金睛火眼監督兩駒在機坪踱步熱身的情況，再目送牠們前往內圈操練，緊張到不得了。
「大英雄」上季三班64分贏同程谷草1200米，如今不但初入四班，而且用巫顯東只負126磅，當然大大有利，5歲精壯馬絕對有條件重開勝門。
至於「幸運年年」表面谷草不及沙田，但此駒既可在陣上跑贏「翩翩」，而「翩翩」其後3戰得2冠1亞，照咁睇「幸運年年」在今場無論怎看，都不會是下風馬。