被取消立法會議員資格嘅劉小麗，早幾日去完旅行返港後，大家都好關心佢會唔會上訴？因9月11日嘅上訴期限將至，小麗嘅一念之差，將會左右九西補選係咪合併進行，亦即好大程度決定民主派會否變相送九西一席畀建制派。政制局長聶德權日前亦講明，補選安排9.11後明朗化。
公義基金優先助小麗
小麗最受關注當然有原因，因為長毛話明上訴，即係新東兩席應分開補選。羅冠聰原屬嘅港島區只有一席懸空，係咪上訴亦唔使考慮合併補選。姚松炎所屬嘅建測界功能組別由界別選民一人一票選番一席，建制派無法用陰招有機可乘。
八方問過小麗，原來佢去完旅行後失聲，講唔到嘢，以短訊查詢時回覆指噚日見完律師，未來幾日應會同民主派見面。上唔上訴，錢肯定係關鍵，小麗坦言有關錢嘅問題唔係一下子有結果，暫時未決定。
守護公義基金發言人鄭宇碩就話，現時基金畀咗DQ四人案第一期官司訟費後，剩番約280萬；由於長毛已完成申請法援，因此會優先畀錢小麗上訴用。