港區人大代表年底舉行換屆選舉，唔少新面孔加入戰團，包括政制及內地事務局前局長譚志源（Raymond）。Raymond噚日自爆5、6月即係未卸任局長前，有港區人大同本地政黨領袖游說佢去馬，以免浪費多年來喺內地建立嘅人脈，自稱近期再諮詢政界睇法，普遍支持佢參選，直言「36個位，應該勉強可以入圍」，坦言會朝人大之路進發，若然當選希望將香港標準及服務引入內地，並作為中港溝通嘅橋樑。
容許減少上班
人大都係小圈子選舉，後台勁自然事半功倍，曾為Raymond上司、極受內地看重嘅前財爺梁錦松率先撐對方去馬。身為南豐集團董事長兼行政總裁嘅梁錦松，由佢牽頭成立嘅創投基金「新風天域」獲Raymond下月加盟，擔任旗下新風天域醫療副主席、新風天域教育主席，難得Raymond有意參與公職，阿松話希望對方喺公職上能為新風天域職務帶來新視角，仲唔介意對方減少上班時間㖭。
原來Raymond今年3、4月公開表示無意過渡新政府後，阿松同新風天域首席執行官吳啟楠先後約佢8次游說加盟，佢話揀新工有3項原則：唔純粹賺錢為上、重視團隊工作、繼續為國家服務，其間都有本地財團招手，新風則3項全中。
Raymond笑稱2003年任阿松新聞秘書時較𠵱家輕50磅，頭髮亦較多，好高興再度合作。至於政制局新局長聶德權嘅表現，Raymond謙稱：「佢一定好過我。」
李八方