練馬師高伯新上季一度陷低潮，但季尾階段來個大逆轉，最終贏到20場，比最低要求16Win多四場。今季高伯新更一開鑼已贏「大籐王」。到本周三晚(6日)谷戰高伯新又擺出強陣，戰馬中「紅旗飛將」、「問鼎高峰」同「傑飛」上季都曾於同程贏過，擺明有心喺季初搶攻。
其中第六場三班1200米隻「問鼎高峰」同程三捷都由Ironman郭能經手，人馬最夾，上月22號亦由郭能試閘，刻意留後冇認真推騎考驗，不過今戰排位表一出，「問鼎高峰」疑似被郭能拋棄，改配李寶利，同場郭能就騎霍利時馬房「上浦猛將」。
郭能解釋原來早喺「問鼎高峰」試閘前，霍利時已打電話搵佢騎「上浦猛將」，郭能亦第一時間答應，當時根本不知「問鼎高峰」會報今場，所以絕非今仗睇淡「問鼎高峰」。
郭能又指「上浦猛將」唞暑前一仗跑獲殿軍只輸頸位，明顯復蘇，加上8歲老馬利季初，在首本路程有力取勝。但郭能亦直言「問鼎高峰」今季轉5歲更成熟，加上性格忠心，服役9仗全部跑入前4名，從不失準，所以若與「上浦猛將」包辦連贏一啲都唔奇。