青年新政梁頌恆、游蕙禎宣誓案終極上訴不獲批，意味新東同九西議席出缺已成定局，建制派協調好新東由工聯會鄧家彪上陣，九西就派民建聯鄭泳舜（Vincent）披甲。
為咗力谷Vincent，民記凡親有議員出鏡，都會搵埋佢一齊亮相，最近仲搵來升呢做勞福局副局長嘅黨友徐英偉幫手拍片，唔知係咪想打造貼地親民一面？
去南山邨茶記談低津
佢哋專登去深水埗南山邨茶記大談基層申請低津計劃嘅難處。唔知民主派補選戰將，有冇諗住搵民主黨出身嘅勞福局局長羅致光拍片抗衡呢﹖
政府舊年推出低津計劃，原本諗住有20萬家庭可以受惠，但到今年8月都係得8萬幾宗申請，批出約7.6萬。Vincent認為問題在於填寫申請表繁複，仲要半年搵僱主加簽一次，令好多基層打工仔卻步，徐英偉認同繁複，仲話填嘅嘢仲多過佢做副局長嘅品格審查，過去都收過唔少投訴，承諾返去睇睇喎。