香港司法獨立係唔係受到干預干涉，法律界（大律師與律師）幾乎一致認為唔係，反對派只係危言聳聽，危害香港聲譽，代表人物有石永泰、譚允芝、林定國、顧敏康等。甚至李國能都出嚟護航，加多一把聲。
持不同意見嘅就有港大法律學院幾位學者，大律師梁家傑，評論員練乙錚教授、李怡等等，假如有人搞一場辯論，由石永泰對練乙錚，一定好好睇。後輩師弟M問左丁山站在那一邊，左丁山就好清楚咁同佢講：「如練乙錚引述，司法權最易受到攻擊，最需要保護，皆因最高法院、上訴庭等法官皆由行政權提名，立法權同意，但司法權對此無甚權力，民主國家如此，於一黨專政國家，一黨更易話晒事。香港特區政府講到尾，會慢慢，逐漸聽從一黨嘅影響，各級法院法官嘅任命權好難抗拒憑意識型態，價值觀念而任命法官嘅。以美國為例，假如特朗普做足8年總統，而最高法院嘅4位自由派（美國人之liberals）法官有病逝或意外死亡嘅話，特朗普一定會令最高法院成為保守派法官嘅領域，特朗普唔會干預佢地審案嘅，但一定有信心預測得到一個保守派全面控制嘅最高法院會如何判案囉。」
干預甚麼司法獨立、編輯自主、學校行政獨立，如果要由最高話事人親自指揮、指導、或甚至命令法庭、總編輯、校長如何行事，你估儍嘅咩，精人唔會！只要一早委任或聘請價值觀念與大老闆相近嘅人做法官、編輯、校長，就意在不言中。霍士電視新聞點解咁為特朗普擦鞋，晚上黃金時間節目日日為特朗普護航呀？大老闆梅鐸邊會干預佢地啫，邊有打電話直接吩咐節目主持人噃，啲主持人好有編輯自主獨立性嘅。梅鐸只係差不多日日同特朗普通電話，friend過打band之嘛。中國大陸執政黨在法庭、報紙、企業、學校皆有黨委書記，負責執行黨中央的政策。香港既是特區，講一國兩制，如明目張膽在香港推行黨委制就是摧毀一國兩制，所以中央只係牢牢控制誰人做特首，誰人做三司及保安系統首長，就可以達到干預目標。唔信呀，年青才俊個個知道，讀完書，飲過洋水回來，想話參政平步青雲，由政治助理爬上副局長、局長職位，唔係考到做AO呀，而係加入民建聯，受民建聯訓練，去多幾次清華大學國情班，有律師資格嘅仲好；加入民主黨就因住他日要失業攞綜援。當然，整個replacement process要有一段時間，但睇嚟已開始了，石永泰譚允芝等叻仔叻女已上高位，或者睇唔到由下而上嘅治港人事變動啦。