新民主同盟譚凱邦（Roy）最近有幸登上左報《文匯報》頭版兼冇被批鬥，之不過身份就由荃灣區議員變成運輸署職員，查實呢兩個職業都唔係阿Roy自小嘅「我的志願」，相信大家估唔到佢曾經諗過做記者。
1980年出生嘅阿Roy係環保先鋒，原來對環保嘅啟蒙源於一位老師。就讀中華傳道會安柱中學嘅佢話中四嗰年，生物科老師帶同學出海睇中華白海豚，「當時近黃昏都睇到成8至10條，我哋當時嘅環保教育概念，只係停留喺海洋公園之嘛，呢次真係感受到大自然嘅奧妙，有啲環保種子散播咗」。
成立環保觸覺圓夢
中四對佢嚟講都幾重要，佢形容呢年之前掛住讀書係乖乖仔，揀大學時順理成章按興趣入咗中大讀環境科學，佢話針對環保議題，中學流於諗點樣做，大學就係實踐期，包括加入綠色天地環保學會做內務副會長，同時又去過新西蘭交流考察環保。
佢自爆當年有3個志願，除咗做教師及環保工作，就係做記者，前兩樣都實現咗，佢曾任教於順德聯誼總會梁銶琚中學，張秀賢都係佢學生，成立嘅環保觸覺為達成夢想。咁點解及後從政，2008年參選立法會九龍西選舉？阿Roy話當時發現環保問題都涉政治，「要走入個制度，先可以更大力推動」。