噚日係農曆七月十四，據講鬼門關大開，《午夜凶鈴》恐怖貞子由古井爬出電視機；《大鬧廣昌隆》淒楚小芙蓉撐傘飄過；《開心鬼撞鬼》古靈精怪嘅張曼玉；泰國堅貞的《鬼妻》……古今中外影視作品到都市傳說，點解鬼古總係女鬼多過男鬼？綜合玄學家、編劇同特技化妝師嘅剖析，可能因為女性較執着兼造型多變，咁樣算唔算男女不平等？
不論人或靈體都有性別、情緒同性格，玄學家麥玲玲同八方講要成為厲鬼，一定係有怨氣，覺得女生情緒較男生波動，「可能遇到寡情薄倖嘅男人、或者有其他意外，怨氣積聚女仔明顯強化啲，咁變咗出現機會都高啲」。咁點解鬼古成日發生喺女廁？佢話廁所多位於建築物頭尾位，陰氣重，女性亦屬陰，故鬼魂容易現身。
寫過《七月十四》、《幽靈人間》等鬼片嘅編劇鄺文偉話，當年創作女鬼純基於直覺，「覺得女鬼陰氣重，比男鬼可怕」，覺得鬼古大都捨男取女或有兩大關鍵，一係陰陽，而女性同鬼都係陰嘅代表，二係東方人相信鬼存在來自怨氣，「有怨氣先有鬼。女人、老人、細路仔比較弱勢，當佢哋被欺負產生怨氣，變鬼順理成章啲」，而男人被蝦積怨變鬼就好似好小家。
「貞子富江有嘢放唔開」
《樹大招風》編劇龍文康就覺得，《聊齋誌異》嘅故事對後世鬼怪題材創作影響深遠，估計女鬼造型豐富喺畫面上較好睇，因而令女鬼多過男鬼，且女性比男士執着：「可能有啲嘢放唔開，例如日本貞子、富江都係女鬼。」但佢嘅舞台劇《過戶陰陽眼》卻用男鬼主導劇情，佢透露最初係寫女鬼，但最後重寫：「我覺得點解全部都用女鬼入手？會唔會試吓男鬼呢？《人鬼情未了》都係男鬼。」
女鬼造型多變，紅或白衣、長髮披面、容貌慘白，外形上保留恐怖死法，更易令女鬼「無處不在」。為海洋公園哈囉喂嘅特技化妝師李穎陽話，女鬼妝要兼顧美貌同恐怖元素，通常用陰影加強陰森效果，取代爛面妝，眼妝令眼角流出黑血等。佢不時睇恐怖片攞靈感，睇過最可怕嘅女鬼係泰國《鬼影》，故事中女鬼坐喺男演員膊上為真相揭盅：「唔係個妝恐怖，而係成件事恐怖。」
李八方