要數官場嘅難兄難弟，前財爺梁錦松同時任新聞秘書譚志源（Raymond）肯定係一對。阿松2003年涉偷步買車，不單因此落台，連Raymond仕途都受影響，但兩兄弟卻冇嘢計，14年後又合體。
阿松讚：能力強而智謀多
政府噚日公佈政制及內地事務局前局長譚志源離開政府後嘅新去向，佢會加入阿松有份創立嘅創投公司、投資內地多個醫療項目嘅新風天域，一次過擔任新風天域醫療副主席、新風天域教育主席兩個職位，下月1號返新工。
身為集團主席嘅阿松話好開心Raymond加盟，大讚呢位為官時嘅舊同事，不單有豐富公共服務經驗，「能力強而智謀多」，非常高興再同佢共事。Raymond當然都好開心同阿松再續前緣，據知佢主要到內地做事，又難怪想選埋港區人大。
食物及衞生局局長前政助陳凱欣就轉投專門出版「有聲書」嘅好聲多媒體有限公司任行政總裁，15號返工。好聲係由伙伴倡自強社區協助計劃撥款資助嘅社企，透過有聲書收錄中國名著、粵曲戲寶、藝人專訪同埋播音故事。