世界盃歐洲區外圍賽A組周一爆出驚天大冷門，𠵱家世界排名第10嘅法國，竟然同世界排名第136嘅盧森堡悶和0:0。其實法國隊派出嘅陣容可以講係「粒粒皆星」，前線有基利安麥巴比、基沙文同埋基奧特掛帥，而中場更有普巴、湯馬士林馬同埋簡迪，單係牌面已經贏盧森堡10條街，但波係圓嘅，盧森堡今次可以話係打出咗代表作。
睇番《Sporting Intel》嘅統計，法國今場正選陣容嘅球員合共身價係四億鎊（約40億港元）；盧森堡正選陣容嘅球員身價只係得27,720鎊（約28萬港元），即代表兩隊嘅身價差距係14,430倍，呢樣嘢亦都喺今場波嘅戰況反映出嚟。法國全場控球率有76%，起腳射門34次，比作客嘅盧森堡多31次，不過射門中框次數就只係得九次，比起盧森堡射三次有一次中框嘅命中率仲要低。
比利時挫希臘闖決賽周
另外，今場賽事可謂大衛「挑機」巨人歌利亞嘅現代版，全因睇番兩隊一共18場嘅對賽往績，盧森堡只係取得一勝一和16負，而最近嘅一場勝仗更加要數到103年前。法國貴為前世界盃冠軍，對住「魚腩」盧森堡都踢成咁，領隊迪甘斯同埋一班球員好應該去面壁思過。至於同組嘅荷蘭就喺主場3:1贏咗保加利亞，落後法國四分同第二嘅瑞典三分，只剩番兩場比賽，都可以講仲有晉級機會嘅。
另一組H組賽事，比利時憑曼聯前鋒盧卡古嘅入波，作客以2:1擊敗希臘，成為明年世界盃主辦國俄羅斯以外，歐洲賽區首支獲取決賽周席位嘅球隊。
