貝湯美入「摩」做主帥，花生友第一時間就聯想到，上季受大摩重用嘅祈普敦，今季處境會變成點？果然開鑼日大摩八匹戰馬，都用晒主帥貝湯美，就連嚟緊星期三(6日)首次谷草夜馬，大摩兩匹報名馬「威力東」同「確威風」都係由主帥湯美仔執韁，祈普敦重返摩門仍要等一等。
不過，相信祈普敦唔使等好耐，因為下期日馬即9月10日，有場90-115分報名範圍之一班1400米廣東讓賽盃，大摩咁多高班馬，相信至少都有兩隻或以上報名，貝湯美冇可能騎得晒，到時便有機會用上祈普敦。
睇番90-115分呢個範圍，既合跑1400米而又有正常操練嘅摩廐馬，包括「飛來猛」、「無敵飛龍」、「喜旺寶」、「彩福」、「人民武士」等，暫時唔知大摩計劃報邊隻，但如果「喜旺寶」列陣而配祈普敦，當然要加倍重視，事關人馬合作8戰得4冠4亞最合拍。不過，「喜旺寶」最近於上月25日已由貝湯美過檔快跳，對祈普敦嚟講，最擔心嘅事，莫講過於失去「喜旺寶」，現階段情況未明朗，一定忐忑不安。