六月倫敦住宅大廈Grenfell Tower發生大火，一眾球員同埋名人趁國際賽期，上周六喺昆士柏流浪主場踢番場慈善賽為災民籌款。最爆嘅首推曼聯領隊摩連奴守龍門！摩佬同平日一樣面口嚴肅，不過54歲嘅佢絕不欺場，飛撲打手槌做到足，仲因為浪費時間被罰黃牌，仲唔係最佳男主角？
為倫敦住宅大火籌款
呢場波除咗球圈人士，仲預埋救災義工同居民玩，非常有意義。摩連奴今場波係入替前英格蘭門將占士，為舒利亞隊守龍，表現當然唔會好好啦，不過摩佬勝在投入，飛撲、手槌樣樣都試吓，仲因為開龍門球前問觀眾拎水飲而被罰黃牌。今場參與嘅球員仲有高治、哥利摩亞、列納、冼佳亞、施文同基雲咁，名人方面，英國田徑名將法拉都有落場，仲為費迪南隊入波㖭！
費迪南隊由冼佳亞梅開二度，場波最後踢成2:2，要互射12碼分勝負，摩連奴雖然射入第三輪12碼，不過守龍嘅佢就一球都救唔到，費迪南隊贏5:3，而摩佬更加延續佢教英格蘭球隊互射12碼未贏過嘅走勢。
其實摩佬原本就冇份踢呢場慈善賽，只係最後一刻佢話想加入，所以先預埋佢。話晒摩連奴教咗車路士咁多年，而今次火災發生喺西倫敦，幾近車仔主場史丹福橋，所以話呢，摩佬雖然同藍戰士反咗面，不過對災民都好有心。
雲佬領曼聯元老贏巴塞
至於摩佬家陣嘅東家曼聯，同日就喺奧脫福上演一場經典戰，由約基同雲達沙領銜曼聯傳奇隊，應戰由古華特同文迪達等人領軍嘅巴塞隆拿傳奇隊。曼聯正選陣容有多位熟識面孔，有雲達沙、杜布連、朗尼莊臣、普波斯基、朴智星、約基、沙夏同埋雲尼斯達萊掛帥。巴塞傳奇隊牌面亦唔弱，有比列堤、艾美臣、戴維斯、文迪達同古華特呀！只可惜「細哨」朗拿甸奴因為早前中國之旅惹上桃色醜聞，所以被球會飛起。
今場波係次回合，首回合曼聯作客贏3:1，今場雲佬同韋伯上半場就為曼聯入兩粒，然後巴塞下半場由前利物浦球星路爾斯加西亞同文迪達一人一球追平2:2完場，總比數曼聯贏5:3，皆大歡喜啦。
