2017/18年度新馬季順利開鑼，今日（3日）沙田跑馬冇受到打風影響，頭場四班1000米直路賽天朗氣清下進行。結果開出紅盤，熱門之一「同得福」輕勝，騎練莫雷拉及蘇偉賢攜手打響新季頭炮，「同得福」服役初出即贏，單Win及組合獨贏A2分別派48.5及27.5元。
四歲澳洲自購新馬「同得福」據報當初由金牌馬販大衛派斯購入，其後轉售予目前馬主易劉瑛琳與易國良，並運來香港出賽。
「同得福」本身之前三度在港試閘均非由雷神經手，惟最終仍落入雷神手上，初次參賽由佢操刀，結果出閘不慢，冇耐即貼住外欄帶放，越放越有，順利旗開得勝，大勝4馬位之多，帶給幕後新馬季一個好開始。
上季頭場賽事由「四季勁」（已退役）擊敗大熱門「永常喜」勝出，後駒當時正係由雷神操刀，事隔一季佢以「同得福」收復前失，可謂功德圓滿。
不過，這天頭場大熱門卻表現失色，主角1.9倍「永旺喜喜」在傷癒復出騎師羅理雅胯下三甲不入，二至四名由「和平開心」、「星心英雄」及「萬事醒」順序瓜分，四重彩派近萬二蚊。同場身價20萬創歷屆香港拍賣會新低的「劍二十」，全程走勢平淡下跑尾二。