現年34歲嘅「巨聲幫」陳國峰，舊年3月同圈外女友黃思雅註冊結婚之後一直努力造人，結果好快畀佢恨到，今年5月喺微博宣佈老婆陀B仔。到咗噚日，陳國峰喺微博宣佈B仔出世：「同大家報個平安，感謝大家嘅祝福同關心，託賴母子平安。」佢仲貼咗B仔同自己滿面鬚根嘅相，睇嚟呢個新手爹哋忙到連鬚都冇時間剃。
B仔係開刀出世，重6磅1安士，比今個月6號預產期只係早咗幾日。榮升爹哋嘅陳國峰噚日接受傳媒訪問時好開心咁話：「我有入產房剪臍帶，心情都仲係好激動，BB出嚟嗰陣都有喊，一嚟見到同太太嘅結晶品出世，二嚟見到太太個傷口好肉痛。暫時中、英文名都未改。」陳國峰話以前唔知媽咪有幾辛苦，𠵱家做咗人爹哋就深深體會得到。
趁大肚留影
其實日前陳國峰都有喺微博貼老婆嘅大肚寫真，預祝老婆生B順利。陳國峰話自己喺輯相度有着褲，兩公婆唔係全祼。佢話：「輯相上個月影，因為未影過啲咁激嘅相，主要係想影吓個肚，咪借住呢次機會影囉，成輯呢張最激啦，影得好靚。」
撰文：馮仁昭
