神級騎師雷神莫雷拉在新馬季開鑼日（3日）狂風掃落葉，頭兩場勝出「同得福」及「智有心得」後，佢於第三場一班1200米特首盃，以沈集成馬房「四季旺」後上輕易奪冠，林鄭月娥首次以特首身份頒獎。雷神前後只花咗一小時，便憑三匹次熱門大演帽子戲法，完全當其他騎師冇到。
「四季旺」沿途守第六位，直路不慌不忙，後上擒下綠魔「有得威」贏1.5馬位，今場單Win及組合獨贏A1分別派39及17.5元。
「四季旺」馬主羅仲煒與太太羅何秀蘭上季開鑼頭場贏「四季勁」（已退役），今季兩人雖唔能夠再贏頭場，但就捧走一年一度的特首盃，仍算成功攞頭彩，至於沈集成下周日（10日）就有「縱橫大地」及「永旺年年」出師韓國一級賽，這天勇奪特首盃，亦幫自己成功造勢。
講番「四季旺」，沈集成早於上季尾一次與「四季」系羅氏夫婦的飯局中，已透露此駒未來目標是年底香港一哩錦標。如今此駒勝出特首盃，成功取得跨季連捷，已經夠晒江湖地位代表香港跑國際賽，本身在港服役亦增至10戰4冠1亞1季，總獎金逼近一千萬關口，可謂表現出色。
本屆特首盃出七駒，結果由四匹較高分的1至4號馬包辦前四名。其中4號「四季旺」排第4檔建功，1號「有得威」入Q，3號「發盈喜」第三，2號「駿皇綵」第二，四重彩派1,599元。