早前颱風「天鴿」同「帕卡」襲港，狂風暴雨下仍然有唔少人緊守崗位；天鴿來訪時任署理特首嘅政務司司長張建宗，更喺當日上、下午接連兩度視察緊急事故監察及支援中心，為當值員工打氣。張建宗對兩個颱風似乎印象難忘，最新網誌藉機表揚喺颱風中執行任務嘅海陸空無名英雄。
天鴿襲港當日上午，桂山島附近海面有十幾名船員墮海，張建宗話政府飛行服務隊無懼風暴威脅派直升機前往救援，就算當時風急浪高，隊員都奮不顧身游繩降落將船員逐一救起，總計天鴿同帕卡兩度襲港，飛行服務隊喺海中救咗60條生命，難怪獲張建宗大派心心。
讚160消防員搜山令人動容
另一件事大家都印象深刻，就係帕卡吹襲期間兩名行山人士被困飛鵝山，消防員連夜派員冒風雨登山搜索，仲喺山崖陪住度過風雨交加嘅一夜，救援行動歷時近24小時先結束，張建宗大讚160位參與拯救嘅消防員展示嘅專業兼勇氣，令人動容。
每次風暴吹襲都有大量航機延誤及取消，但上述兩個颱風襲港後，張建宗話香港機場都迅速恢復機場運作同服務，明顯係各方面合作嘅成果，佢仲特別點名話渠務署同事喺天鴿吹襲前一晚入大澳通宵留守，巴士車長喺颱風下返車廠候命，敬業樂業精神令人敬佩，大讚無論公務員團隊或公營機構員工，兩次颱風中都展示出高度專業能力。「歪風」瑪娃又掠過香港，難怪佢喺網誌寄語無名英雄喺風雨中緊守崗位。
李八方