大家好，新馬季有幸於《蘋果》撰寫專欄，同大家分享心得，交流意見，最重要分析一下騎練動態、馬匹上仗備忘，以及試閘好表現馬。
開鑼日報名唔滿額屬正常現象，暑期休息短部份練馬師不急搶攻。但上季開鑼戰起孖兼捧走特首盃的沈集成，先擺下強陣，派出16匹賽駒參戰。第三場「四季旺」上季四歲系列賽證明有質素，今次跑1200米略短，但預計步速較快，後上有利。嘉年華閘羅理雅代試，稍騎表現有力，見好即收，變化地有賽績，有權為沈廄再捧特首盃。
尾場三班1400米選擇範圍較多，目標落喺季初急攻馬房。徐雨石上季頭三個賽日已取六場頭馬，「財寶家駒」1400米首本路程累積兩場頭馬，上季中升三班仍有力兩度入Ｑ，嘉年華閘羅理雅親試，馬匹出腳有力，全程扣實，有種若隱若現味道。
同場告東尼的「帝豪寶寶」同程只失一次獎金，今年才四歲，早前試閘?步上前，承接上季尾跑開，加上上季潘頓騎東廄馬上名率亦高，值得重視。「大籐王」跑同程兩次例得亞軍，今季四歲更進步，嘉年華閘試落大把在手，重十六磅有壯身感覺，黏地亦能應付，唯12檔欠少少運氣。「估惑」蔡約翰北半球三歲一出即勝同程，能力超班，但畢竟三歲負頂磅有一定難度。「貨如輪轉」上季跑過三次同程其實已顯鬥心，惟沈集成用上近三季只合作七次全落第的柏寶，邊線分子。
第十場四重彩及四連環額外一百萬多寶，不妨動動腦筋。祝各位馬到功成，旗開得勝！
黃楨淘