朗尼今季由曼聯重返愛華頓，以為會重新振作，不過本性嘅嘢，真係好難改。朗尼上周五凌晨因為涉嫌醉酒駕駛被拘捕，更爆係朗尼當時揸嗰架車有另一個女人，係一位叫Laura Simpson嘅OL，月巴又衰多次，睇嚟有排解畫。
朗尼係喺英國時間當地大約凌晨兩點被捕，喺佢寓所附近揸車被警方截查兼拉埋，之後喺早上離開警局。醉駕本身已經大件事，其後被踢爆佢當時所揸嘅甲蟲車唔係佢本人，而係屬於一名29歲OL，據英國《鏡報》嘅報道，呢位神秘女人叫Laura Simpson，職業係房地產經紀，佢點樣識得朗尼，又同佢做過乜就真係冇人知，淨係知佢同朗尼過咗「好瘋狂嘅10粒鐘」，懷疑有人趁老婆身在西班牙同家人度假，又發作偷食。
OL笑對朗尼挑逗
Laura隨後接受英國《太陽報》訪問爆料：「我喺當晚大約10點去到酒吧，朗尼同佢朋友走嚟自我介紹，之後大家坐低有講有笑。佢似乎對我身材好有興趣，望到實一實，仲問我對胸size有幾大，仲話：『如果係真嘅我好想摸吓喎。』我之後一笑置之，佢似乎俾我搞到暈陀陀，當時我冇話畀佢知我對胸其實係僭建嘅。可以遇上出名嘅足球員，呢啲機會可遇不可求，所以我都好開心可以同佢傾偈。當時我已經飲醉，但我冇做錯到任何嘢，我唔係破壞其他人婚姻嘅人。」佢仲話：「我哋（同朗尼）度過咗瘋狂嘅10小時。我都唔知點解大家會咁high，但一切都嚟得好快，唔知係咪因為我飲大咗，但我睇佢似乎唔係飲得太醉。」
激嬲老婆同朗奴高文
另有報道指朗尼喺涉嫌醉駕被捕前幾個鐘，有球迷發現佢喺酒吧同前曼聯隊友布朗飲酒狂歡，其間又喺吧枱上跳桌上舞同唱Oasis嘅歌，由下晝開始玩。出事後高蓮已經即刻由馬略卡飛返英國，睇怕要向朗尼大興問罪之師。
另外，愛華頓領隊朗奴高文亦對呢件事勁嬲，因為今夏同朗尼傾「愛回家」嗰陣，要求月巴要生生性性做好榜樣。事實上，朗尼由出道起，同佢有關連嘅負面新聞一直不絕，18歲時就被揭成日光顧一名48歲妓女。之後又被爆喺老婆高蓮懷孕期間，至少七次嫖妓，搭上妓女珍妮兼大玩3P。
朗尼好杯中物，喺上年一輪世盃外，本來因膝傷退隊嘅朗尼，被爆出喺英格蘭3:0大勝蘇格蘭比賽後嘅周末，出席私人婚宴時同三獅隊友勁飲啤酒同紅酒，情況失控語無倫次。朗尼亦愛賭錢，被揭今年三月趁老婆高蓮帶三子外遊，半夜去曼市一間賭場，兩個鐘就輸咗50萬鎊（約500萬港元）。