教育局向中學提供通識教材「學與教資源」，擺明嘥紙，浪費公帑，想對初中學生哥洗腦，難過叫上帝留位。
我家就有一位「初哥」，聽完教材中的騎呢例子，拍掌大笑：「好啊，一於公民抗命，抗議學校逼學生穿校服。那條大熱天時扭得出水的長褲，質料差爆，又唔型又唔爽，着住佢，真係無公義！」
初哥仔，這個就是公民抗命？「當然係，老師校長個個便服，鍾意着乜都得，點解學生要咁老土，着到呆瓜咁。」你們初哥仔，可以點樣重奪服裝自主呢？「媽，你咪用個奪字啦，好暴力嘛。」唔使慈母上身都知，初哥仔非常贊成罷課，最好一年裏頭只需上學一個月，其他時間宅家，打機飽。「咁除了罷課，還可以着住泳褲返學嘅，出位抗議。」係喎，早前試過某校男生抗議校服褲太熱，的確穿了女同學的校裙出去午膳，照片po上社交網，但無晒下文。英國也有男生穿女校裙回校抗議，法國有巴士司機穿半截裙返工，抗議巴士無空調下穿長褲制服簡直攞命！
香港夏天愈來愈㷫，我建議中學在特殊日子讓男生試吓水着革命（唔關魚蛋事），讓他們泳褲上堂，露出「一股歪胸」，有利反思，公民社會在威權管治的炮火中，如何咪住嘴，前進。