已故著名影星柯德莉夏萍（Audrey Hepburn）優雅氣質風靡萬千影迷，其私人珍藏會喺今年9月假倫敦舉行現場及網上拍賣，而中環置地廣場中庭由即日起至本月8日，率先展出部份拍品，包括附有柯德莉夏萍親筆註解嘅《珠光寶氣》劇本、電影《花都奇遇結良緣》着過嘅禮服，仲有佢親手繪畫嘅油畫，估價由100英鎊至9萬英鎊（港幣1,000元至90萬元）。
《珠光寶氣》劇本藏筆迹
展品係柯德莉夏萍私人珍藏，一直由佢家人擁有，今次係公眾首展。柯德莉夏萍兒子肖恩．夏萍．費雷爾（Sean Hepburn Ferrer）話今次展覽具代表性，反映佢媽媽嘅生平點滴，譬如媽媽拍攝電影時，會趁空檔用筆寫下心得及註解，打開劇本就會睇到媽媽嘅筆迹。
今次估價最高嘅展品就係《珠光寶氣》劇本，劇本後面仲有柯德莉夏萍用藍色原子筆寫嘅字句。
展覽亦展示多件柯德莉夏萍嘅服裝，包括風衣、禮服以及佢曾係電影着過嘅戲服。肖恩話佢媽媽從來唔會跟隨潮流，衣着有其獨特風格。
眾多展品當中，肖恩自己就最鍾意母親繪畫嘅油畫《我的庭園花朵》，估值港幣15萬至25萬元。
