平時大家睇《蘋果》見到好多靚相、上動新聞又睇到咁多好片，有冇諗過都係靠一班攝記們喺背後付出咗好多汗水呢？香港攝影記者協會噚日舉辦嘅「前線．焦點2016」新聞攝影比賽頒獎禮，就表揚咗一班喺舊年表現傑出嘅攝記們，除咗唔少得《蘋果》攝記有獎外，今年大會首設多媒體獎，亦由《蘋果》團隊包辦3個獎。
八方嘅攝記同事喺突發新聞、一般新聞、體育、特寫、圖片故事不同組別奪6獎，當中何柏佳憑一張旺角騷亂中警員舉槍嘅相，奪得突發新聞相冠軍，而何家達就以一輯拍攝港人玩Pokémon GO嘅圖輯，贏咗圖片故事冠軍。八方喺度再次恭喜佢哋！因應新媒體發展，攝協今年增設多媒體比賽，不過只設3個優異獎，並且由《蘋果》團隊一手包辦晒，認真犀利！