國泰航空將本港空中服務員退休年齡定為55歲，但其他工作崗位就可以做多5至10年先退休，呢個咁唔公平嘅現象，職工盟秘書長李卓人梗係睇唔過眼，佢噚日就連同香港空勤人員總工會代表，與平機會主席陳章明會面，投訴國泰年齡歧視，雖然香港仲未就年齡歧視立法，不過陳章明話會約見國泰管理層，反映工會延長退休年齡嘅訴求。
阿人追殺國泰行動其實又點止咁簡單，佢話早前翻閱國泰2016年可持續發展報告，發現國泰唔止連續15年獲「商界展關懷」嘉許，仲被納入恒生可持續發展企業指數同富時社會責任指數。
佢話要成為呢兩項指數嘅成份公司，須符合多項條件如尊重人權，但國泰喺退休問題上涉年齡歧視，根本唔符合資格，所以佢早前已去信負責評核嘅機構，要求重新檢視國泰究竟有冇資格獲納入有關指數，兩機構都覆咗話會因應新資料重新審視喎。