噚日香港攝影記者協會舉辦2016年得獎展，政務司司長張建宗帶同其新上任嘅政治助理蕭嘉怡到場做嘉賓，特首林鄭月娥上場後話要搞好傳媒關係，小肥張致辭時亦不忘大讚攝記，仲話要向一眾攝記致敬。
讚新聞相片凝住時間
張建宗致辭時話，有時一張新聞相片已勝過千言萬語，所以佢參觀得獎展品時就覺得真係好精采，特別係得獎相反映晒過去一年香港發生嘅事，猶如瞬間看香港，大讚攝記們用鏡頭凝住時間，佢又特別講到未來一兩日可能又打風，屆時一眾攝記又要出動，故此特別要向攝記致敬。
對於近年唔少攝記都要影相兼拍片，張都知行內形容係「一雞兩味」，但佢覺得應該叫「一專多功能」啱啲，佢作為外行人真係望塵莫及，又重申當局致力保持言論、新聞和資訊自由喎，之後佢仲同一眾得獎攝記自拍。至於同佢一齊出席活動嘅中西區前區議員蕭嘉怡，政府噚日正式刊憲公佈佢原本個區議會議席出缺，張就話好開心蕭加入，盛讚蕭有豐富、實戰嘅地區經驗，希望蕭能做好同政黨、議員助理溝通。