已夠分殺入2018俄羅斯世盃嘅巴西，周四喺主場出戰南美洲區外圍賽，憑近日轉會市場焦點、利物浦中場菲臘比古天奴嘅入球，以2:0擊敗厄瓜多爾，西甲轉會窗香港時間周六朝早先閂，古天奴去唔去巴塞？截稿前仲未知。
講番場波，主場出擊嘅巴西今場冇因為出咗線放軟手腳，正選中亦有韋利安同尼馬等主力，不過巴西上半場就入唔到波，半場同厄瓜多爾未有紀錄。下半場，巴西喺59分鐘換入「傷癒」嘅古天奴，主隊亦喺10分鐘後由荷西保連奴開紀錄，之後古天奴喺76分鐘再建功，鎖定勝局贏2:0。其餘南美洲區的賽果，烏拉圭就喺主場同阿根廷踢成0:0，美斯同蘇亞雷斯由隊友變敵人，不過大家都冇波入，但就友誼第一，賽後仲一齊支持國家申辦2030世盃。