特首林鄭月娥上任兩個月都仲未請到新聞統籌專員（IC），上任IC、自比「白宮發言人」嘅馮煒光就搵到新工喇，政府公佈馮10.1起會為周融創辦嘅網媒「HKG報」做自由身評論員，同聲同氣相信好啱key。
其實馮煒光之前已經獲批做報紙專欄作家同埋開公關公司，今次佢除獲批到HKG報，仲會出書兼做自僱財務顧問，原來馮煒光仲考埋保險牌，香港保險業聯會網頁顯示，佢喺上個月尾（25日）登記成保險代理，服務公司係保誠保險。數埋馮煒光打成5份工，唔知加埋有冇做IC時咁一萬蚊一日呢？睇番政府嘅公佈，馮將會出關於回歸前英國對港管治嘅書，唔知佢本書會唔會叫做《煒論》呢？