【本報訊】金綸校服的客戶不乏傳統名校，例如聖士提反女子中學、拔萃小學等。時代變遷，校服幾番新，由以往簡約的藍、灰等演變至現在花款多多，一塊格仔布料也甚講究。老闆林松坡笑指香港學生「肥咗」，店內售賣的西褲腰圍已去到44吋。
金綸校服總店第三層是不對外開放的小型工場，處理加印校章、改褲腳腰圍等即時工序；林指60年代不少校服店包括金綸都度身訂做，但隨着教育普及，全人手製作應接不暇，惟有轉賣現貨，有專人改校服、取樣製衣，「例如客人要改短條褲，可能叫佢第二日嚟攞，唔使又攞返去廠，如果急嘅，咪叫佢飲個茶再返嚟……如果唔夠貨，都會叫同事取樣整住一批先」。現在自設小型工場的校服店買少見少，「因為養住人（裁縫師傅）都係成本」。
現時金綸店內存備尺碼較以前齊全，單是西褲已有54個尺碼，校裙則以每半吋的裙襬長度細分，林說：「可能𠵱家啲小朋友營養好咗、肥咗，我哋西褲褲頭最大已經去到44吋！」提到校服款式日新月異，林指「名校多數唔會點轉款，因為佢哋有傳統……以前都有好多係一款校服着到畢業，𠵱家就好多學校都係分初小、高小兩款校服」。
■記者葉偉東