特首林鄭月娥呢排頻頻北上，噚日亦帶咗3個局長去咗深圳前海考察，其中一站係深港青年創業基地，包括到訪香港青聯前主席吳傑莊搞嘅香港青年專業聯盟（YPA）眾創空間孵化企業，協助推動港青建立嘅事業王國，而噚日向林鄭展示創業團隊講解者，有啲熟口熟面，睇真啲，係理大學生會前會長黃俊瑯嚟㗎！
原來黃俊瑯𠵱家喺YPA創業孵化器中，做緊一個知識共享嘅網上平台，仲成為一個被重點孵化嘅項目，吳傑莊話希望有更多同類例子，鼓勵多啲港青到內地創業。林鄭噚日亦有同深圳巿領導會面，佢話希望喺港、深政府努力下，兩地能夠成為亞洲嘅「設計雙城」。