舊年初因押股被斬倉，有「洋參大王」之稱嘅楊永仁被逼出讓恒發洋參（911，現稱前海健康）。噚日前海健康一紙公告，楊永仁細佬、執董楊永鋼都辭埋職，正式完場。
公司原本由楊氏家族主理，三位執董分別係楊永仁、楊永鋼同佢哋媽咪傅鳳秀。賣盤後，當然就要退位讓賢，而本住「讓領導先行」嘅原則，楊永仁、傅鳳秀早喺舊年5月中已經辭任，楊永鋼就噚日正式辭任執董，話要投入更多時間履行公司嘅西洋參貿易總經理職務，仲會以總經理身份為公司服務咁話。
其實當年恒發上市，楊永仁白手興家嘅故事流傳一時，加上夠膽用上市編號「911」夠突出。不過事隔數年，人事幾番新，家陣只係時不時聽到楊永仁被入稟追債，佢虧沽物業或銀主盤等新聞。
李華華