保良局董玉娣中學嘅學生會候選內閣成員，為咗選舉瞓晒身，喺拉票短片rap足3分鐘，唱盡內閣班底成員。由於曲風成熟兼歌詞精準，旋即喺網上瘋傳，網民大讚學生「有料到」，果然唔好睇小香港年輕人，個個都有freestyle。
呢段熱爆短片係董玉娣中學新學年學生會候選內閣Pixel拍嘅，介紹正、副會長以至康樂等崗位17名「莊員」。學生嘅超預期演出獲得網民一致激讚，形容係「中學有嘻哈」，候選外務副會長趙文浚全程rap得似模似樣，候選會長趙文浩則喺全曲最後幾秒，一邊入鏡、一邊rap出「唔使搵喇！我就係會長趙文浩」，被形容為神來之筆，有網民仲大讚「好有型」！
八方問過趙文浩，趙話莊員想拍片宣傳，競逐外務副會長嘅孖生細佬趙文浚睇過內地真人show《中國有嘻哈》後，隨口提出：「不如我哋拍條MV rap咗佢好唔好？」點知弟弟隨口噏卻為Pixel帶來空前成功。
大佬：喜出望外
雖然唔係rapper，趙文浩話自己但平日都會聽唔同類型嘅音樂，今次宣傳片嘅背景音樂係喺網上搵到，全隊人用咗3、4日創作、拍攝同剪輯，「除了第一次拍攝嘅片段於剪接時發現對不上嘴形之外，都沒有其他特別大嘅難題」。
對於影片喺網上有巨大迴響，趙文浩話真係冇諗過，強調最初只係期望趁暑假先上載宣傳片，開學後學校「有啲人會唱兩句」，已經心滿意足，「所以都真係喜出望外」。
成功嘅宣傳片只係起步，佢話學生會選舉其實9月21日先舉行，開學後仲有一連串宣傳工作要做，包括要「洗樓」宣傳等。咁除咗今次rap出宣傳片，日後會唔會再rap吓其他作品？趙文浩話喎，一旦當選，事務應該會比較忙，「可能就會沒有太多機會去創作。不過如果有機會的話，我們亦會作出新的嘗試」。
李八方