颱風天鴿早前吹襲港澳，造成兩地多人死傷，天災固然無情，但其實亦都反映政府管治問題，特別係澳門；天文台長被辭職，但因為佢遲掛幾個鐘頭八號波，就會引起大停電大停水嚴重水浸？又未免太睇得起佢，得罪講句，佢咪又係代罪羔羊。小弟有唔少澳門親戚，知道澳門由葡治時代到𠵱家仲遺留嚴重官僚問題，懶散、推卸、愛理不理，總之就淨係想出糧，乜都唔想做。
周日睇利物浦狂勝阿奴，身為廠迷嘅我都算哀莫大於心死；𠵱家嘅阿仙奴，就充斥住官僚文化一樣，不思進取。由一個領軍21年嘅領隊，坦白講上季尾已經應該開始要退休拎長糧，雲格仲懶死唔走兼續多兩年約，今時今日「wenger out」橫額係少咗，不過唔係球迷對佢有信心，而係球迷知道，點舉牌租飛機，都係改變唔到高層心態。
官僚文化另一個壞處就係因循苟且，即係聽啲高官口脗，就係咩「按以往基制程序，我哋乜乜乜，已經盡最大努力……」，今時今日環境瞬息萬變，唔好話幾年前，上年講你聽，有球隊用2.2億歐元違約金買尼馬，你都唔會信啦，但世界轉得太快，尼馬轉完會，巴塞又轉頭簽番奧士文尼迪比利，世界紀錄頭兩位都換晒人，雲格仲守住以前啲續約規限，而唔知出邊世界點運作。
阿仙奴大敗，山神（右）俾人影到偷笑，引起兩面正反批評，有迷雲黨批評山神影響士氣，其實嗰陣隊波有咩士氣可言，小弟亦有公務員朋友，中下層公務員潛規則，最努力最認真工作，就往往被人排擠，因為佢嘅勤力，就反應其他人懶散，所以千方百計搞走佢，所以山神，你都唔適合官僚文化嘅阿仙奴㗎嘞。
文：牽牛