【今日ENT】李克勤將於下月3日起假紅館舉行九場入行30周年紀念騷，昨日在新蒲崗綵排時做《蘋果》facebook直播節目《今日ENT》，當自彈自唱《一生不變》時，同樣入行30年的神秘嘉賓周慧敏突襲搗亂，克勤見到玉女掌門人出現又驚又喜：「哎呀！點解勞煩你呀？」
向阿倫偷師
周慧敏問克勤可否唱得不似CD？他笑說：「我成日都走音，自從《左麟右李》之後，喺拍檔（譚詠麟）身上學識enjoy個騷，不過開頭唔得，發覺跳得唔好會好唔開心。」克勤還爆今次開騷請了周慧敏做嘉賓，其間他不停抹汗，有網民問為甚麼見到周慧敏就猛流汗？周慧敏幫口解釋：「因為我去到邊都會叫人閂細冷氣，同埋頭先暈車浪，成身白花油味。」
網民又八卦想知兩人如何成為好友？克勤說：「我哋因為新秀識，之後約埋一齊參加19區業餘歌唱比賽，不過你甩咗我底，可能你參加就未到我。」周慧敏笑說：「總之我影響咗你一生。」
50周年開騷
之後兩人受訪，明年1月就到周慧敏開紀念騷，克勤說：「我開頭以為30周年好巴閉，有啲新人見到我鞠晒躬，死啦，我係咪好老？去睇阿姐（汪明荃）演唱會即刻釋懷，50周年登七，佢好勁仲跳舞。」周慧敏笑說：「所以我哋30年只係閒閒哋，前排我做秋官（鄭少秋）騷，佢哋兩位都係50周年，突然諗起我同你。」克勤說：「不如50周年一齊做啦，如果大家唔嫌我哋老。」周慧敏即同意：「好珍惜同好朋友同台機會，呢啲真係倒數。」
克勤更大讚玉女掌門人沒變過：「30年前識佢反而有肥妹仔感覺，記得你有個大蝴蝶喺頭。」周慧敏說：「嗰個蝴蝶我唔想放上去，因為我天生爆炸頭，嗰時冇負離子，隻蝴蝶陪我過咗一段日子。」
採訪：余燕儀、吉吉、畢傑、馮國康
攝影：仇志德