馬迷餓咗馬個幾月，終於等到今日(30日)排位喇，9.3開鑼戰各場各駒配搭及檔位已經公佈咗，大家又可以仔細刨馬了。
冠軍騎師雷神莫雷拉騎足10場兼惡馬如雲，當然是常識吧。而前冠軍潘頓有8匹座騎亦唔少，「有得威」、「盈進」、「帝豪寶寶」等都極具分量。但再對上一位冠軍騎師韋達就慘咯，居然只得兩匹馬跑，只多過得一駒上陣的吳嘉晉、賴維銘，唔通練馬師們已當韋達唔存在。
韋達今期只為第四場四班1200米草地的「獻惑」及第六場四班1400米之「紅駿之星」效力，有好多時間坐冷板觀戰，始終年紀一日比一日老，這位45歲老將好難好似昔日咁風光。
不過上述兩駒其實唔錯，告東尼馬房的「獻惑」埋門試閘勝出，重口馬啱韋達偏柔韁繩；而葉楚航「紅駿之星」回跑兩勝之1400米，如果韋達能取得頭馬，有番一點聲勢的話，相信下期谷草夜賽，座騎不致於兩隻咁少。