賭王何鴻燊三房「最索千金」超蓮，前年同台灣歌手吳克群結束四年情，近月傳與楊受成細仔楊政龍有新緋聞，指相識多年嘅楊政龍用契哥身份積極對佢展開追求。噚日有周刊報道指上周二佢哋一齊去數碼港拍拖睇戲，仲搵嚟一對男女友人做煙幕，睇完戲就由楊政龍開車接走。
聞楊政龍甜笑
超蓮同楊政龍噚晚喺會展齊齊現身，出席香港青年聯會就職典禮，同場仲有霍啟剛，超蓮講到緋聞話：「當然唔係啦，我哋之間係Smile with us HK，另外兩個朋友係創辦人，唔係煙幕，我哋成日見面傾嘢，希望年輕人多啲接觸社會，我哋會見面開會諗活動，之前幫咗個單親媽媽搬屋。」講到同楊政龍係世交，記者笑佢哋理念相襯，超蓮甜笑話：「其實成個會都襯，朋友之間有共同理念先form到。」楊政龍若然追求佢會唔會應承？超蓮笑話：「講慈善，唔係講追求，大家都關心我有冇拍拖，關心吓社會，自己趁呢個年紀畀多啲心機，幫到社會，同幫媽咪手最重要，拍拖暫時唔會諗。」問到揀男友係咪都要多做慈善？佢話：「有共同理念當然可以。」
撰文：馮仁昭
