南港島綫舊年開通，加上即將開通嘅沙中綫，金鐘站應該會成為超級大站，到時層數多到乘客想唔迷路都難，冇方向感嘅人走入迷宮咁嘅港鐵站入面，喺地底入面冇咗Google呢個好幫手，點算好？港鐵為咗避免乘客迷路，嚟緊9月會喺港鐵App加個金鐘站內導航功能，到時一App在手，唔怕蕩失路。
牆身嵌QR Code藝術作
透過App內新增嘅「站內搜尋」功能，乘客可以用搜尋金鐘站內嘅設施、月台等，例如喺站內行行吓想去廁所，個App就會有條藍色嘅導航路線帶你去。平時約親friend都話某出口等啦，有咗導航功能，只要將個location share畀個friend，就可以企定定喺原位，由個App帶你個friend嚟搵你，相信鍾意喺港鐵站交收嘅人都會like爆！
大家最近途經金鐘站，更會見到樓梯牆身有5個超大嘅藍色QR Code，周圍仲有好多摩斯密碼，原來呢個叫做「訊點」嘅藝術作品，如果你對摩斯密碼有研究，不妨到金鐘站內解下密，話唔定有啲驚人訊息等你去發掘。