新任行會成員、安老事務委員會主席林正財醫生出席一個關注長者同退休人士活動時，主動提到傳媒取笑新一批行會成員平均年齡近62歲，「我嘅答案好簡單，其實62歲都好後生」。
今年56歲嘅林正財話，最近同外母慶祝91歲生日後，估計老婆可能有110歲，已叫太太好好規劃人生，因為60歲退休後，可能仲有50年生活要過。
林醫生估計香港未來唔只三分一人口，隨時係二分一都係長者，「可能退休後嘅年日，仲長過退休前」，佢話傳統退休年齡定喺60歲，「已經完全唔切及𠵱家現實」，亦指話社會將來屬於年輕人之說，只係講啱一半，「因為年輕人越來越少，你將成個社會嘅未來，擺喺年輕人身上，好有可能係擺錯咗對象，因為佢哋萎縮緊」，認為社會未來應聽多啲中年同老年人嘅聲音喎。