散嘞散嘞，究竟有幾多個阿仙奴球員會喺轉會煞科日跳船？阿歷斯山齊士想去曼城，阿歷士張伯倫又話去利物浦，梅斯達菲就被國米睇中，而基蘭基比斯更過檔西布朗。喺未來24小時，相信兵工廠會係轉會窗嘅主角。
曼城5億+求購山神
英超轉會窗喺香港時間九月一號朝早六點關閉，德甲會早幾粒鐘，意甲同法甲就同英超差唔多時間，至於西甲就遲英超一日先閂。嚟到今夏轉會窗最後階段，上場聯賽被利物浦大炒四蛋嘅阿仙奴，有種鳥獸散嘅感覺，個個爭住走人。山神唔肯續約，擺明想走，但領隊雲格死都唔放人。曼城諗住用史達寧加錢換，但阿仙奴還價要阿古路，真係擺明唔使傾。曼城最新現兜兜出價5,000萬鎊（約五億港元）求購，但被兵工廠拒絕，據《天空體育》講曼城會喺日內提高報價，志在必得。
唔知係咪上場親身感受過利物浦水銀瀉地嘅進攻後愛上紅軍嘞？被改造為右翼衞嘅張伯倫亦想離隊，仲話非紅軍不去。張伯倫同山神一樣出年約滿，阿仙奴唔強留，接受咗車路士4,000萬鎊（約四億港元）嘅報價。點知張伯倫竟然拒絕去車路士，話想去利物浦。若果今夏去唔成紅軍，佢寧願喺阿仙奴留多年，等明夏以自由身走人。至於梅斯達菲亦怪，上季先嚟到阿仙奴，踢得好地地，但上場對利物浦冇正選，仲傳出佢會過檔國米。國米想先借後買呢位德國中堅，先畀借用費460萬鎊，之後有權以2,300萬鎊買斷。
利記搶林馬做準備
除咗阿仙奴外，利物浦亦好忙，焦點當然係菲臘比古天奴啦！雖然利物浦講明今夏唔賣佢，但我求大俠始終覺得係錢嘅問題，有西班牙傳媒聲稱交易會喺聽日落實。呢兩日利物浦亦突然出手求購摩納哥中場湯馬士林馬，話唔定就係為古天奴離隊作準備。
傳咗利物浦想買修咸頓中堅華基爾雲迪積克好耐，唔知最後又傾唔傾得成呢？英超以外，大家亦要留意巴黎聖日耳門買「新亨利」基利安麥巴比嘅交易。
