香港教育大學噚日都舉行開學活動，歡迎超過1,500名修讀榮譽學士學位同其他課程嘅新生。原來今年亦有約1,000名非本地研究生及交流生加入教大大家庭，幾乎數得出嘅國家、冷門或熱門都有，內地學生當然唔少，其他如比利時、捷克、丹麥、芬蘭、加納、哈薩克斯坦、緬甸、沙特阿拉伯同瑞典等等都有㗎。
香港教育大學校長張仁良當然都有出席活動歡迎呢班教大新鮮人，佢仲笑晒口同大家selfie，其間仲hyper到做埋韓星冧女至強嘅心心手勢㖭。張仁良話往後幾年，教大會成為同學仔第二個家，希望佢哋喺第二頭家攞到寶貴學習體驗，透過正規同非正規課程，喺學術同個人方面有所成長，寄語佢哋好好享受呢幾年喺大學嘅生活。