阿仙奴鳥獸散，小弟覺得同領隊雲格嘅管理哲學有關。雲格前幾年講過，佢認為球會嘅薪酬架構係社會主義模式，球員間嘅人工差唔遠，結果令到勁嘅球員人工低，容易被挖走，亦有啲踢到心灰意冷，越踢越hea，最緊要嘅係吸引唔到頂級球星去食大鑊飯，令球隊陷入惡性循環之中。
喺阿仙奴入面，巨星級好似阿歷斯山齊士同奧斯爾，周薪都係14萬鎊左右，好多主力就喺10萬鎊上下，包括基奧特、艾朗藍斯同禾確特呢啲。不過，曼城、曼聯同車路士嘅普通主力都係10幾萬鎊，而頂級球星就過20萬鎊。雲格話佢嘅社會主義人工模式有個好處，就係避免隊內球員比較，但就算山神自己唔同藍斯呢啲隊友比，佢都會好自動咁同保羅普巴、夏薩特、阿古路去比。做嘅嘢差唔多，但喺阿仙奴打工嘅周薪就收少10萬鎊，所以話有能力嘅球員點會唔想走！
至於奧斯爾（圖）睇嚟係另一種情況，佢呢幾年喺阿仙奴嘅表現每況愈下。相比山神嘅肉緊同失望，奧斯爾似乎就睇化咗，成日懶懶閒咁，選擇hea踢。其實好容易代入佢嘅諗法，身邊啲格列沙加、藍斯踢得唔多好，但人工就同自己差唔多，試問奧斯爾又點肯出力！仲有，頂級球員自然會想同番頂級球員做隊友，但阿仙奴唔肯出高人工，冇星肯嚟，山神同奧斯爾都覺得冇希望。當最大牌嘅球星想走，一股渴望走人嘅風氣就自動傳開去，好似阿歷士張伯倫呢啲亦想求去。
咁搞落去，阿仙奴一係送走晒班星賺轉會費，轉型做英超摩納哥，或者換個領隊，轉換風氣。
文：咖喱