港區人大代表有36個，現屆代表任期明年初屆滿，換屆選舉料喺年底舉行。今次換屆據知有近三分一人「夠鐘」要退下火線，包括人大常委范徐麗泰，建制各門各派當然爭崩頭要分一杯羹，盛傳連跳出熱廚房嘅前局長譚志源，都有意轉跑道選人大，新丁對手或包括經民聯立法會議員梁美芬以及范太嘅囝囝范駿華，唔知最終呢班新星，邊位會喺選舉期間獲阿爺「祝福」？
有傳媒報道政制及內地事務局前局長譚志源積極考慮參選人大，9月會有決定，搞開內地事務，同阿爺關係點會差？盛傳佢獲得中方鼓勵去馬，要爭一席做舉手機器可謂無難度。其實前局長卸任後做人大為國家服務，都唔係新鮮事，現任港區人大代表其中一位咪就係前保安局局長李少光，據知佢今屆亦都因年齡退下火線，譚志源正好補番佢個位。八方都等緊譚志源回覆，係咪覺得同人大代表嘅步伐，會較同林鄭班子更一致？
而喺范太退下火線後，常委之位要搵個壓得住場嘅建制人士出任，民建聯前主席譚耀宗料由政協轉線選人大，肯肯定接任常委。范太雖然卸任，囝囝范駿華卻盛傳接棒登場參選，雖則有建制中人對於「世襲」安排有微言，但相信佢成功入局機會相當大。據知梁美芬同陳曼琪兩位建制女將都有意爭凳仔，論江湖地位，當然係鼠王芬被看高一線。
田二少有落馬危機
八方聽聞，想爭連任嘅人大中，唔係個個都咁穩陣，好似實政圓桌田北辰就有落馬危機，有港區人大話喎，二少過往不時脫韁，同大隊漸行漸遠，有人仲形容佢嘅言行更似民主派，部份建制派未必buy。
李八方