可能玩家都會對前幾年行Android的NVIDIA Shield Portable手提遊戲機有少少印象，今年年初更有傳會推出第二代產品，不過自此之後就音訊全無。近日有網民在一個地方意外「發現」到相信是NVIDIA Shield Portable 2的開發機，不過相信大部份朋友都應該估唔到發現地點竟然會在加拿大某二手店之中。
有位Reddit討論區用家在二手店「發現」到這部有可疑的手提遊戲機後就即時買下，然後在討論區上貼出相片，經其他網友確認，這是一部未曾正式推出市場的NVIDIA Shield Portable 2。NVIDIA Shield Portable 2的規格都唔差，如用上四核ARM Cortex-A57處理器、3GB RAM及5.89吋1,440x810解像度顯示屏，機身亦無第一代產品咁笨重。從今次被發現的跡象所見，NVIDIA Shield Portable 2開發計劃好有機會已經告終；不過其實亦好正常，一般用家用Android手機打機已經足夠，無必要再買一部玩到同樣遊戲的手提遊戲機。
資料來源：Reddit
記者：布偉倫
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily