現年46歲嘅劉小慧，於14歲出道，當年以清純形象打入巿場，更有「學生情人」之稱，當年佢同湯寶如及黎瑞恩係「寶麗金小花」。歌手出身嘅佢，代表作有《夢幻星座情人》、《留住這一刻》、《初戀情人》，以及同關淑怡、湯寶如同草蜢合唱嘅《熱力節拍Wou Bom Ba》等，都算有成績。
至於影視作品方面，劉小慧有參演過幾套電視劇，包括處境劇《卡拉屋企》，而佢最令觀眾留下深刻印象嗰套，應該係90年代大台劇《我愛牙擦蘇》，佢飾演男主角牙擦蘇（張衞健飾演）鍾情嘅朱茵茵，戲份都搶嘅。而劉小慧亦拍過電影，較為人熟悉嘅有《七小福》、《童黨之街頭霸王》、《神算》及《超級學校霸王》等。
儘管劉小慧當年未去到天后級之位，但佢形象正面，喺90年代後期開始減產，更喺97年嫁蘇志威，並先後誕下兩名千金，劉小慧婚後專心相夫教女，間唔中先會參與演藝工作，好似做演唱會嘉賓，但主力係做全職蘇太。